Prins Yves zal regeren oonder de naome:
- Groet Gamin vaan de John F Kennedy
- Joonkhier vaan boetegood Daalhovia Commandeur vaan de platte knoup
- Iere sjoem slörper vaan de Pepel accedemie
- Besjermhier vaan de graasmatte vaan Leonidas
- Gevolmachteg baankwermer vaan 't ierste elftal
- Protecteur vaan de Wolderse straotcarnaval!
Persoenlijke weitensweerdighede:
Ziene naom is Yves Custers, gebore in Mestreech op 26 oktober 1997 en is dus 25 jaor joonk.
De prinselijke hoftempel ligk bovenop de Malberg oan de Vierduitruwe op nómmer 5. Dao woent heer same mèt zien vriendin Vera Beulen en hun waakhunneke Lola.
Yves is gebore en getoge in Mestreech. Heer heet ziene jäög ès geminke doorgebrach in de Plutohof op Daalhof. Hei heet heer samen mèt zien breurke Noel en zien awwers Iwan en Manon gewoend. Zien awwers zien sinds kort in Wolder koaome woene, Yves heet dao nog even vaan kinne proffitere. Samen mèt Vera heet heer zich pas geleie ’n sjoen huiske gekoch.
Zien carrière begos heer op basissjoal John F. Kennedy op Belfort. Naodat Yves ziene eige naom kos sjrieve moch heer door nao ‘t St. Maartenscollege. Umtot heer good had opgelet kos heer nog get jäörkes doorliere aon ’t Cios in Sittard. Op dit momint verdeent heer zien cent bij Mondriaan in Mestreech es Pedagogisch medewerker.
Neve de sjaolbaanke had Yves ouch nog tied um get bij te verdene mèt heerlijke Spaonse hepkes te servere bij Kaffee Madrid. Al gaw woort dudelek dat heer ’t leuker voond um gleeskes beer te tappe. Dit heet heer mèt hiel vaol leefde en vakmansjap gedoon in de hoeskamer vaan Wolder, Kaffee de Pepel.
Prins Yves I begos zien voetbalcarrière bij Leonidas pas op 12-jaorige leeftied. Dit umtot heer druk bezig waor mèt kneupe te lègke en verstupperke te speule bij de scouting vaan Wolder genaomp Henri Dunant Florence Nightingale. Al gaw had Yves door dat de bal roond is en wis heer dat links links en rechs rechs is. Momenteel helt heer de baank vaan ‘t 1e elftal werm umtot heer geblèsseerd is, meh aanders speult heer mèt zien sjeun naor väöre.
Hobbies
Zien vriendin Vera is netuurlek zien veurnaomelekste bezegheid, zjus wie voetballe en e pötsje beer drinken. Yves houwt ouch gere tege ’n belke op baon 11 same mit Bert vaan de kentien.
Wis geer tot Yves:
- Heer ouch luustert nao de bijnaom Ansu Fati in ‘t kleidlokaal, en dat is neet umtot heer zoe good kint voetballen mer umtot heer zoe dèks geblèsseerd is.
- ’t Mestreechs keteerke heet bedach en dèks zien horloge kwiet is?
- Aajd prins is vaan de Spoorzeukers EN de John F. Kennedy Sjaol?
- Zien prinses bij de dames op ’t ierste elftal voetbalt?
- Heer regelmaoteg de kaffee op sloot deit en e gleeske beer lus?
Heer zal onder d'n titel Prins Yves d'n ierste met belump en vaste hand 't volk vaan Wolder veurgoon in de zwoer meh plezerige weke vaan en veur de vastelaovend. Dees beneuming woort op e laat oor in dees daog geapprouveerd en geconstersigneerd, um te weure geannonceerd in 'n openbaar zitting in de kentien vaan Leonidas op 27 jannewarie vaan 't jaor 2000+11X2+1.
Naomens de kanselarijraod vaan CV Leonidas
Lang leve Prins Yves d'n 1e, lang leve Wolder en lang leve de Wolderse vastelaovend Hiep Hiep!!! ❤️💛💚
